tibetan feature

 ავტორი: ლი ლა

 ხუთი ტიბეტელის ვარჯიშების კვლევას მივყავართ ინგლისელი კოლონიალისტის, პიტერ კელდერის, ისტორიებამდე, რომელიც ტიბეტში მოხვდა და ბერებთან ერთად საკმაოდ დიდხანს მოუწია ცხოვრება. იგი გააოცა ამ ადამიანების ახალგაზრდულმა მჩქეფარე ენერგიამ და ჯანმრთელობამ, რომლითაც მათი სხეულები ვიბრირებდა და გადაწყვიტა გაეგო რა ცოდნა იდგა ამ ყველაფრის მიღმა.

 შედეგად პიტერმა 1939 წელს გამოსცა წიგნი ,,საიდუმლოების თვალი’’, რომლითაც მსოფლიოსთვის ცნობილი გახდა ხუთი ტიბეტელის სპეციალური ტექნიკები და უძველესი ცოდნა, რომლებსაც ავტორის გადმოცემით ბერები იყენებდნენ ენერგიის დასაბალანსებლად და ახალგაზრდობის შესანარჩუნებლად.

 ვარჯიშების ამ სისტემას უკავშირებენ ტიბეტურ იოგას, რომელიც ძირითად აქცენტს აკეთებს მოძრაობაზე, განსხვავებით ინდური იოგასგან, რომელიც უფრო მეტად სტატიკურია.

 ხუთი ტიბეტელის ვარჯები აგებულია იმ შეხედულებაზე, რომ ადამიანის სხეულში არსებობს 7 ენერგეტიკული ბორბალი, რომელთა მუშაობაზეც დამოკიდებულია ადამიანის ჯანმრთელობა. ასაკის მატებასთან ერთად ბორბლების მუშაობა ფერხდება და სხეულიც ვერ ფუნქციონირებს გამართულად, ეს იწვევს სიბერეს და სხვადასხვა ავადმყოფობას. ხუთი ტიბეტელის ვარჯიშის შესრულების შემდეგ ენერგეტიკული ცენტრების ნორმალური ფუნქციები აღდგება და სხეულიც დაბალანსდება. საბოლოოდ თქვენ იგრძნობთ, როგორ ახალგაზრდავდებით და როგორ იბრუნებთ ჯანმრთელობას.

 ხუთი ტიბეტელის სავარჯიშოები შედგება 21 მოძრაობისგან, რომელიც გაერთიანებულია 5 სრულ და მარტივად შესასრულებელ სავარჯიშოში. 21 მოძრაობის მთლიანად შესრულებას დაახლოებით 2 საათი დასჭირდებოდა დღეში, ბერებს რომ ისინი რამდენიმე ვარჯიშში არ გაეერთიანებინათ და ერთი სისტემა არ შეექმნათ. 5 ტიბეტელის ვარჯიშების სისტემის ჩამოყალიბებამ შესაძლებელი გახადა საჭირო მოძრაობების შესრულების დრო 20 წუთამდე შემცირებულიყო. ეს არამხოლოდ ტიბეტელი ბერებისთვის იყო მეტად მოსახერხებელი 2500 წლის წინათ, არამედ იდეალურია თანამედროვე ადამიანისთვისაც, რომელსაც საკმაოდ გადატვირთული დღის რეჟიმის გამო შეიძლება უჭირდეს დიდი დროის გამოყოფა სხვადასხვა სისტემით ვარჯიშისათვის.

 რეკომენდაციები:

 თუ შეძლებთ, რომ ამ ვარჯიშების შესრულებისთვის ყოველ დღე ერთი და იგივე დროითი მონაკვეთი აიღოთ იდეალური იქნება. უმჯიბესია სავრჯიშოები შესრულდეს დილით, გაღვიძებისთანავე. კარგია სრული ციკლის შესრულება დღეში სამჯერ, მაგრამ თუ ამის საშუალება არ გაქვთ, გააკეთეთ მინიმუმ ერთი ციკლი ყოველ დღე.

საბოლოოდ, რეკომენდირებულია დღეში 21-ჯერ გაიმეოროთ თითოეული სავარჯიშო, მაგრამ ამ მიზანთან თანდათანობით უნდა მიხვიდეთ:

პირველ კვირას თითოეული სავარჯიშო სრულდება 3-ჯერ გამეორებით. 

მეორე კვირას - 5 ჯერ გამეორებით.

მესამე კვირას თითოეულ ვარჯიშს ვიმეორეთ 7-ჯერ.

მეოთხე კვირას 9-ჯერ და ა.შ

მეათე კვირას უკვე 21 ჯერ ვიმეორებთ თითოეულ სავარჯიშოს და შემდეგ ყოველ დღე ვაკეთებთ იგივეს.

 21 გამეორებაზე მეტი თითოეულ სავარჯიშოზე არ არის რეკომენდირებული.

 როგორ სრულდება 5 ტიბეტელის ვარჯიშები:

 პირველი ვარჯიში:

1

დადექით ისე, რომ ხერხემალი სწორად გქონდეთ, მიადგით ფეხები. ხელები გაშალეთ ჰორიზონტალურად იატაკის მიმართ, ხელის გულებით ქვევით და დაიწყეთ ტრიალი საათის ისრის მოძრაობის მიმართულებით. სავარჯიშოს დაწყებამდე თვალებით დააფიქსირეთ ერთი წერტილი და ეცადეთ მას უყუროთ ყოველი მობრუნების შემდეგ - ეს მობრუნებების თვლას გაგიადვილებთ. შემდეგ ხელები მკერდის წინ შეაერთეთ ხელისგულებით და კონცენტრირდით ცერა თითებზე. ეცადეთ, რომ ტრიალი იყოს რაც შეიძლება სწრაფი.

სუნთქვა: ისუნთქეთ ღრმად მთელი პროცესის განმავლობაში

მეორე ვარჯიში:

2

დაწექით ზურგზე, ხელები დადეთ სხეულის პარალელურად. ფეხის წვერები მიმართეთ შიგნით. შესუნთქვასთან ერთად აწიეთ ფეხები და თავი ერთდროულად. ეცადეთ ფეხები რაც შეიძლბა ვერტიკალურად გამართოთ. ამოსუნთქვაზე დადეთ თავი და ფეხები ერთდორულად. დასრულებისას მოადუნეთ სხეული და ღრმად ისუნთქეთ.

მესამე ვარჯიში:

3

დადექით მუხლებზე, ხელები დაიდეთ უკან, ბარძაყის კუნთებზე. ბოლომდე ამოისუნთქეთ და ამასთან ერთად თავი გადახარეთ წინ გულ-მკერდის არისკენ. ჩასუნთქვასთან ერთად ნელ-ნელა გადახარეთ თავი უკან და გადაიხარეთ წელის არეშიც, ბარძაყები მთელი პროცესის განმავლობაში იატაკის მიმართ ვერტიკალურად უნდა დარჩეს.

მეოთხე ვარჯიში:

4

დაჯექით იატაკზე, გაასწორეთ ხერხემალი, ფეხები გაშალეთ და დაალაგეთ მხრების სიგანეზე. ნელა დახარეთ თავი გულ-მკერდის არისკენ. ჩასუნთქვასთან ერთად მოხარეთ ფეხები და ტანით აიწიეთ ზემოთ იატაკის პარალელურად, თავი უკან გადახარეთ. ცოტა ხნით შეიკავეთ სუნთქვა, შემდეგ კი ამოსუნთქვასთან ერთად დაუბრუნდით საწყის პოზიციას. (ისუნთქეთ რაც შეიძლება ღრმად)

 მეხუთე ვარჯიში:

5

დაწექით იატაკზე მუცლით, ხელის მტევნები დაიდეთ მხრებთან ახლოს, ფეხები გაშალეთ მხრების სიგანაზე. ჩასუნთქვასთან ერთად აიწიეთ ხელებზე და რაც შეიძლება ჩაზნიქეთ ხერხემალი, თავი უკან გადაწიეთ. ამოსუნთქვაზე გაასწორეთ ტორსი ისე, რომ იგი ჰორიზონტალურად გაუსწორდეს ხელებს, არ მოხაროთ ფეხები, სხეულმა უნდა მიიღოს ამობრუნებული ლათინური ,,V’’ ასოს ფორმა.

შედეგები:

მას შემდეგ რაც ხუთი ტიბეტელის სავარჯიშოები მთელს მსოფლიოში გავრცელდა, იგი უამრავმა ადამიანმა გამოსცადა. ზოგიერთი ამბობს, რომ ამ სავარჯიშოებმა არამხოლოდ ჯანმრთელობა და ენერგიულობა აგრძნობინეს მათ, არამედ გაცილებით ახალგაზრდულად გამოიყურებიან, კანი დაუმშვიდდათ, ფრჩხილები გაუმაგრდათ, თმები კი უფრო მოცულობითი გაუხდათ. არიან ისეთებიც ვინც ამბობს, რომ ასე კარგად წლებია არ უგრძვნიათ თავი. ზოგიერთს მოუწესრიგდა ძილი, მოუგვარდა ხერხემლის პრობლემები და შეუმსუბუქდა კუნთების ტკივილები. ეს მცირე ჩამონათვალია იმ ბენეფიტებისა, რომლებსაც ადამიანები 5 ტიბეტელის ვარჯიშების პრაქტიკის შემდეგ იღებენ, ამიტომ თუ ენერგეტიკული ცენტრების დაბალანსება გჭირდებათ, უენერგიობას განიცდით, ან უბრალოდ ახალგაზრდული შეგრძნებების დაბრუნება გსურთ, ეს ის სისტემაა, რომელიც აუცილებლად უნდა სცადოთ და გახადოთ თქვენი ყოველდღიური რუტინის განუყოფელი ნაწილი.

ვიდეო თვალსაჩინოებისთვის: