imma7

გნოზისი, ანუ ანგელოზის გული

(სიზმარხილვების წიგნი)

ავტორი: იმმა

თუ გინდა ააშენო გემი, არაა საჭირო შემოკრიბო ხალხი, დაგეგმო და გაანაწილო სამუშაო ან იზრუნო ხელსაწყოებზე. საკმარისია გადასდო ადამიანებს უკიდეგანო ზღვის წყურვილი და ისინი თავად ააშენებენ ხომალდს. (ანტუან დე სენტ-ეკზუპერი)

წინასიტყვაობა

მახსოვს თხუთმეტი-თექსვსმეტი წლის ასაკში მე და ჩემს მეგობარს ასეთი გატაცება გვქონდა - მოთხრობების წერაში ვეჯიბრებოდით ხოლმე ერთმანეთს. ჩემი მეგობარი, რომანტიკულ ჟანრს არ ღალატობდა, მე კი ყველაფერში მინდოდა თავი გამომეცადა და ხან სასიყვარულო რომანებს მივედ-მოვედებოდი, ხან დეტექტივებს და ხან კიდევ ფანტასტიკურ მოთხრობებს. ყველაზე მეტად მაწუხებდა ის, რომ როგორც ორენოვან ოჯახში გაზრდილ ბავშვს, რადგან დედას რუსულად ველაპარაკებოდი და მამას ქართულად, ერთდროულად ორ ენაზე ვაზროვნებდი ხოლმე. ერთი წინადადება შეიძლებოდა რუსულად გამეაზრა, ხოლო მეორე ქართულად. ეს ჩვევა ძალიან მირთულებდა საქმეს და წერაში ხელს მიშლიდა.

მახსოვს ერთხელ საწერ მაგიდას მივუჯექი და რაღაც შინაგანმა ხმამ მიკარნახა მოთხრობის სათაური - „ანგელოზის გული“! რატომღაც შინაგან გზავნილს დავემორჩილე, სათაური დავწერე და ფურცელს მივაშტერდი. ვერც იმას ვხვდებოდი, საიდან მომივიდა ეს სათაური თავში და ვერ იმას - რაზე უნდა ყოფილიყო მოთხრობა. რა უნდა დაწერო როცა სათაური იცი, მაგრამ შინაარსი არა? იდეები არ მომივიდა და საკუთარ შესაძლებლობებში იმედები მალევე გამიცრუვდა. დავასკვენი რომ არასაკმარისი ფანტაზია და წერის ნიჭი მაქვს, საიმისოდ რომ ამ ასპარესზე რაიმე ვარგისი შევქმნა და წერას თავი დავანებე. ცხოვრებამ მწერლობის სფეროს სრულიად ჩამომაშორა და ჩემმა არჩევნებმა სულ სხვა გზით წამიყვანა, მაგრამ ახლა, როდესაც ჩემი მოგონებების წერას შევუდექი, ძალიან კარგად ვაცნობიერებ შინაარს და რახან სათაურის შერჩევაზე მიდგა საქმე, ვიცი, რომ ამ წიგნს მხოლოდ ერთი სათაური შეიძლება ჰქონდეს - „ანგელოზის გული“! ეს წიგნი ჩემ სულიერ მასწავლებლებთან მისტიკური ურთიერთობის გამოცდილებას აღწერს და არ ისახავს მიზნად ვინმესთვის აზრის მოხვევას ან ფასეულობების შეცვლას, არამედ უბრალოდ ამ გამოცდილების გაზიარების სურვილითაა მოტივირებული. წიგნი ოთხი ნაწილისგან შედგება: მოგონებები, „ხიდს აქეთ“, „ხიდს იქით“ და შეჯამება. „მოგონებების“ ნაწილის შემდეგი თავები დღიურის ფორმატშია დაწერილი და მიმდინარე მოვლენებს აღწერს. ასევე შიგადაშიგ ჩამატებულია ამონარიდები ჩემი „ინტერნეტპოსტებიდან“, რომელიც ინტერნეტში ამ წიგნის პასაჟების გამოქვეყნებას ახლდა თან.

ყველა მოვლენა რაც აქ არის აღწერილი რეალურად მოხდა და თითოეული სიტყვა სიმართლეა იმდენად, რამდენადაც მე მესმის ამ ცნების არსი.

ახალი თავები ეტაპობრივად დაემატება...

წიგნის სრული PDF ვერსია შეგიძლიათ გადმოწეროთ ფეისბუქ-ჯგუფიდან - გნოზისი