ქანქარა - ეს არის ნივთი, რომელიც გაძლევთ საშუალებას შეაღწიოთ პლანეტის ინფორმაციულ ველში და მიიღოთ სასურველ კითხვაზე პასუხი ან სხვა სახის ინფორმაცია. ვთქვათ, თქვენ ხართ ადამიანი,რომელიც არ ფლობს რაიმე განსაკუთრებულ ზებუნებრივ უნარს და არ გაქვთ სურვილი ან საშუალება მიმართოთ მკითხავს, მაგს, ექსტრასენსს. ასეთ შემთხვევაში ქანქარა იდეალური საშუალებაა მიიღოთ პასუხები პლანეტის საერთო ენერგოინფორმაციული ველიდან. გარკვეული დროის განმავლობაში ეტაპობრივად ვარჯიშის შედეგად ქანქარასთან მუშაობა გამოსდის თითქმის ყველას. პლანეტის ველთან კავშირი მყარდება ქვეცნობიერის მეშვეობით.
რა შეგვიძლია გავიგოთ ქანქარის მეშვეობით?
ქანქარა საშუალებას გაძლევთ გაიგოთ ბევრი რამ საკუთარ თავსა და შესაძლებლობებზე, ჯანმრთელობაზე. ასევე ქანქარის მეშვეობით შესაძლებელია დაკარგული ნივთის პოვნა, საკვები პროდუქტების ვარგისიანობის შემოწმება, ამინდის პროგნოზირება, ჩაკრების დიაგნოსტირება და სხვა.. ამ სიის გაგრძელება უსასრულოდ შეიძლება..
როგორ დავამზადოთ ქანქარა?
ქანქარის შეძენა შესაძლებელია ნებისმიერ ეზოთერულ მაღაზიაში, თუმცა დასაწყისისთვის უმჯობესია თქვენივე ხელით დაამზადოთ იგი. ქანქარის ასაგებად შეგიძლიათ გამოიყენოთ მსხვილი ძაფი ან უბრალო ჯაჭვი 20-22 სანტიმეტრის სიგრძის და მასზე ჩამოკიდოთ სიმძიმე, ეს შეიძლება იყოს რომელიმე მინერალი, ხე, პლასტმასი, სანთლის ცვილი, მეტალი(უბრალო რკინისა და ლატუნის გარდა). სიმძიმე უმჯობესია იყოს კონუსის ფორმის, ამოტრიალებული ცრემლის ფორმის ან უბრალოდ ბურთულა. რაც ყველაზე მთავარია მისი დამზადებისას იყავით უბრალონი, არ ეძებოთ რაიმე განსაკუთრებული თვისების ან ვიზუალის მქონე სიმძიმე, თქვენი განწყობა უნდა იყოს მხოლოდ პოზიტიური, თუ გინდათ რომ მან კარგად იმუშაოს, მოგცეთ ყოველთვის სწორი პასუხები, ჯაჭვსა და სიმძიმესთან ერთად დაუმატეთ მას სისუფთავე, სიყვარული, მზრუნველობა, იყავით უბრალონი და გულწრფელნი მასთან, შედეგად მიიღებთ იდეალურ ქანქარას, რომელიც იმუშავებს პირადად თქვენთვის. ქანქარის სხვისთვის მიცემა, თხოვება დროთა განმავლობაში ასუსტებს მის მოქმედებას, ამიტომ უმჯობესია თუ თქვენი პირადი ქანქარა იქნება მხოლოდ თქვენთან.
როგორ ვიმუშაოთ ქანქარასთან?
პირველ რიგში საჭიროა განთავისუფლდეთ აზრებისგან, ეჭვებისგან, ზედმეტი ემოციებისგან, მხოლოდ მაშინ შეძლებთ ქანქარასთან მუშაობას, როცა სრული სიმშვიდის მდგომარეობაში გადახვალთ. მუშაობა ხდება მაგიდასთან, აიღებთ ფურცელს და დახატავთ მასზე საშუალო ზომის წრეს, შემდეგ ქანქარას დაიჭერთ მარჯვენა ხელში, ცერა და საჩვენებელი თითით. იდაყვი ან უნდა იდოს მაგიდაზე, ან აწეულ მდგომარეობაში ზუსტად 90 გრადუსიან კუთხეს უნდა ქმნიდეს სხეულთან მიმართებაში. ქანქარა ფურცლიდან დაახლოებით 1-2 სანტიმეტრის სიმაღლეზე დაიჭირეთ. მუშაობისას ქანქარასთან საუბარი მკვეთრად გამართულად და დალაგებულად არის საჭირო. უთხარით ქანქარას რომ დაიწყოს მოძრაობა, დავალება მიცემულია, მოძრაობის დასაწყებად კი მას „სივრცე“ სჭირდება, ნუ შეუშლით ხელს მუშაობაში თქვენი აზრებით და დაძაბულობით, ეცადეთ ზედმეტი კონცენტრაცია არ მოახდინოთ მის მოქმედებაზე, ხელით არანაირი მოძრაობა არ შეიძლება! თუ პირველ ორ ცდაზე არ დაიწყებს მოქმედებას ეცადეთ უფრო მეტად შეხვიდეთ მასთან კონტაქტში, თუ ამის შემდეგაც არ დაიწყებს მოქმედებას კიდევ ერთხელ გადაიკითხეთ სტატია და დარწმუნდით ინსტრუქციების შესრულების სისწორეში. ქანქარამ მოძრაობა უნდა დაიწყოს წრიულად საათის ისრის მიმართულებით. თუ ქანქარა უბრალოდ ჰორიზონტალურად ან ვერტიკალურად მოძრაობს უთხარით მას დაიწყოს ბრუნვა. ნელ ნელა მიეცით დავალებები, უთხარით გაიზარდოს, შემცირდეს, ასწრაფდეს შენელდეს, ამის შემდეგ დახაზეთ ფიგურები ფურცელზე და ცადეთ მათი კონტურების შემოხაზვა, გაითვალისწინეთ რომ ქანქარა კუთხეს ვერ შემოხაზავს, თუმცა მოხდება ფორმის ასე თუ ისე მიღება.. ქანქარასთან მუშაობის პირველი ეტაპის წარმატების გავლის შემდეგ გადახვალთ მეორე ეტაპზე, სადაც მარტივ კითხვებზე პასუხის მიღებას ისწავლით ქანქარის მეშვეობით : ფურცელზე დახაზავთ წრეში ჩასმულ ჯვარს, ქანქარას დაიჭერთ ჯვრის ცენტრზე და „მოელაპარაკებით’, კითხეთ თუ რომელი მოქმედება აღნიშნავს დადებით პასუხს? მოძრაობას რომელსაც ქანქარა შეასრულებს ან წრიულად ან ხაზოვნად ეს მოძრაობა იქნება დადებითი პასუხი. შემდეგ უარყოფით პასუხზეც იგივეს გააკეთებთ. ამით სრულდება მოლაპარაკება და ნელ-ნელა შეაჩვევთ მას მარტივ კითხვებზე პასუხის გაცემას, მაგალითად : -მე გოგო(ბიჭი) ვარ? , -მე სკოლაში ვსწავლობ?, -ვმუშაობ? და ასე შემდეგ.. არასწორად დასმული კითხვაა : -მე გოგო ვარ თუ ბიჭი?, -მე სკოლაში ვსწავლობ თუ ინსტიტუტში?, -ვმუშაობ თუ არა?
კითხვების გართულება უმჯობესია მოხდეს ეტაპობრივად.
გისურვებთ წარმატებას!
ავტორი: თამარ წიკლაური
