მთარგმნელი: ანეტ შტრაუსი; Ikigai / იკიგაი
ვიდეო-ვერსია:
2018 წ.
ინტერვიუ ლორა მაკაბრესკუსთან
სულიერის სურეალურთან შეთავსებით, პოლონელი ფოტოგრაფი, ლორა მაკაბრესკუ, მომაჯადოვებელ ფოტოებს იღებს, რომლებიც ზღაპრებით არის ინსპირირებული. ფოტოგრაფი თითოეულ სურათში ავლენს როგორც თავის ტექნიკურ უნარებს, ასევე მის მიზიდულობასაც ფანტაზიური სამყაროს მიმართ.
თავდაპირველად, მაკაბრესკუს ნამუშევრებზე დიდი გავლენა ჰქონდა ძმები გრიმების ზღაპრებს, თუმცა ახალგაზრდა ფოტოგრაფი ახლა კათოლიციზმში პოულობს შთაგონების წყაროს. ტრადიციულ ბიბლიურ ნარატივებთან ფანტაზიის შეთავსებით, საშუალება ეძლევა, რომ შეიცნოს და გამოხატოს თავისი სპირიტუალური რწმენა-წარმოდგენები.
- რამ მოგცათ ინსპირაცია იმისთვის, რომ ფოტოგრაფიას გაყოლოდით?
- ადამიანის სული თავისი არსით შემოქმედებითია, შექმნის სურვილი სამყაროსა და საკუთარი თავის გამოცდის ინტენსივობით იბადება. ეს არის მცდელობა, რომ თვალი გაუსწორო აზრებს, რომლებიც ამ გამოცდილებების შემდეგ მოდიან. რაც თავი მახსოვს, შექმნის მიმართ ძლიერი სურვილი სულ მქონდა. დავიწყე ლექსების წერა, შემდეგ ფოტოგრაფიაში წასვლა გადავწყვიტე. ვფიქრობ, ეს ჩემი მოგზაურობის დასასრული არ არის.
- როგორ დაახასიათებდით თქვენს სტილს? დროსთან ერთად თუ შეიცვალა?
- ჩემი სტილი პროგრესირდა დროის გასვლასთან ერთად. დავიწყე ძალიან ბნელი, უსიცოცხლო ფოტოების გადაღებით, რომლებიც უმეტესწილად ანდერსენისა და ძმები გრიმების ზღაპრებით იყო ინსპირირებული. წლები რომ გავიდა, როცა ჩემმა პიროვნებამ სახე იცვალა და ჩემი სული სიჩუმისთვის უფრო გახსნილი გახდა, ფოტოებიც უფრო ნაზი და მინიმალისტური გამოვიდა.
- რამე სპეციფიური გავლენები თუ არსებობს თქვენი ფოტოების მიღმა?
- ჩემი შთაგონების წყარო სარიტუალო ნახატებია, განსაკუთრებით, ორთოდოქსული ხატების. ასევე უდიდეს გავლენას ახდენს ჰაგიოგრაფია და ბიბლია.
ყოველდღიურ ცხოვრებაში, როგორც ხელოვანისთვის, ჩემთვის ინსპირაციაა ადამიანები, როგორებიც არიან პოლ დელვო, ჯენ ვან ეიკი, როჯერ ვან დერ ვეიდენი, არნოლ ბოკლინი, ვილჰელმ ჰამერშოი, ჰიერონიმუს ბოხი, ჯერზი ნოვოსიელსკი, ანდრეი ტარკოვსკი, სემუელ ბეკეტი, არვო პარტი და წმინდა მარია ფაუსტინა კოვალსკა.
- თქვენს შემოქმედებას ახასიათებთ როგორც "ფოტო-ბიოგრაფიას". შეგიძლიათ განავრცოთ ეს იდეა?
- ორივე - ჩემი ფოტოების ესთეტიკაც და თემებიც, ეხმიანება ჩემს პირად გამოცდილებებს. ეს უფრო მეტად 2014-2015 წლებში დაიწყო, როცა მე ღრმა სულიერი ცვლილებები განვიცადე. ასეა თუ ისე, ვფიქრობ, რომ ამ მხრივ ნებისმიერ ხელოვანს შეიძლება შევხედოთ, რადგან ხელოვნების განცალკევება, თვითონ ხელოვანისგან, რთულია. ამ ორს ერთმანეთზე ძალიან ძლიერი გავლენა აქვს.
- სიზმრისებური პორტრეტების გარდა, ფოტოგრაფიის რაიმე სხვა მიმდინარეობაშიც თუ მუშაობთ?
- იმ ფოტოების ხასიათი, რომლებიც მაინტერესებს, მაიძულებს, რომ ფოტოგრაფიას უფრო შემოქმედებითად მივუდგე (რაც კონტრასტში მოდის დოკუმენტურ ფოტოგრაფიასთან), აქედან გამომდინარე, არ ვცდილობ, რომ რამე სხვაც ვაკეთო.
ვფიქრობ, ახლა უფრო მეტად იმ საგნებში ვცდილობ ღრმად ჩაძირვას, რომლებიც რელიგიას ეხება, - ტრანსცენდენტურ თემებს, და უკან ვიტოვებ პირად ემოციებსა და პორტრეტებს.
- რაიმე სამომავლო გეგმები თუ გაგაჩნიათ?
- დიახ. ფილმის გადაღებაზე ვფიქრობ და ძალიან გამიხარდება, თუ საჭირო სიმამაცესა და კომპეტენტურ ხალხს ვიპოვი. აგრეთვე, წელს გამოიფინება ჩემი ნამუშევრებიც - ზოგიერთი მათგანი პოლონეთში, ზოგი კი, საფრანგეთსა და ბელგიაში.
