ავტორი: ანა თოფურიძე
„..არსებობს მეხუთე განზომილება, იმის მიღმა რაც ადამიანთათვისაა ცნობილი. ესაა განზომილება ისეთივე ფართო როგორც კოსმოსი და ისეთივე უდროო როგორც უსასრულობა. ისაა სინათლის და ჩრდილის ზღვარზე. მეცნიერებასა და ზებუნებრივს შორის. ისაა ადამიანის შიშების ყველაზე ბნელი ქვესკნელის ძირსა და ცოდნის უმაღლეს მწვერვალს შორის. ესაა წარმოსახვის განზომილება, განზომილება, რომელსაც ჩვენ „ბინდის ზონას“ ვუწოდებთ...“
„ბინდის ზონა“1959 წელს გადაღებული სერიალია, რომელიც თანამედროვე ფენტეზის, ფანტასტიკის და ჰორორის ბიბლიად მიიჩნევა. ესაა სერიალი ადამიანის და სამყაროს საიდუმლოებებზე, შიშებზე, სიკვდილზე, ეშმაკებზე, ანგელოზებზე, სიკვდილის მოტყუებაზე, ადამიანის დაუნებებლობაზე, გონებრივ შესაძლებლობებზე, წარსულში მოგზაურებაზე, მეცნიერებაზე, პარალელურ სამყაროებზე, უცხო პლანატებზე, მონსტრებზე, კოსმოსზე, სოციუმის პრობლემებზე, რობოტებზე, მარტოობაზე, კინოზე, ხელოვნებაზე, ილუზიებზე და ყველაფერ იმაზე რაშიც ცნობისმოყვარე გონება ერთობა.
საოცარია მსახიობების შესრულება და მათი მონდომება, ინდივიდუალიზმი. დიალოგები და სცენარები. დასმული კითხვები და მათზე ნაპოვნი პასუხები ფილმის დამაინტერეგებელი დაძაბული სიუჟეტის ყურებისას. ესაა დეტექტივიც, მისტიკაც, ფანტასტიკაც, ჰორორიც და ეს ყველაფერი დახვეწილ თვალისთვის სასიამოვნო შავ-თეთრ წარსულის ესთეტიკაში. აღსანიშნავია კადრების სრულყოფილი კომპოზიციები და 60 იან წლებში არსებულ მინიმალური ტექნოლოგიებით ასეთი შთამბეჭდავი ატმოსფეროს მიღება. ჩრდილი, განათება, სარკე, წყალი და კამერის მოძრაობა აღწევს იმ მაქსიმუმს რასაც თანამედროვე ფილმები. ხოლო მონოლოგები და ის მოგზაურობები სადაც ნარატორს მიყავხართ, ბევრად ღრმა და ღირებულ ადგილებამდე მიგიყვანთ, ვიდრე ბევრი თანამედროვე ფილმი.
