მთარგმნელი: დავით თავბერიძე
თავიანთი ფორმითაც კი რიცხვები სიცოცხლის ევოლუციის შესახებ გვიყვებიან. სიმრგვალე სიყვარულზე, სწორი ხაზი კი ერთგულებაზე მიუთითებს. ხაზების გადაკვეთა გამოცდაა.
სათითაოდ განვიხლოთ:
0: სიცარიელე, თავდაპირველი ჩაკეტილი კვერცხი.
1: მინერალების სტადია. მხოლოდ ხაზი. უძრაობაა. დასაბამი. ყოფნა, მხოლოდ და მხოლოდ ყოფნა, აქ და ამჟამად, დაფიქრების გარეშე. ეს შემეცნების სტადია გახლავთ. აქ რაღაც არის, რაც არ ფიქრობს.
2: მცენარეული სტადია. ქვედა ნაწილში ხაზია, მაშასადამე, მცენარე მიწას ეჭიდება. გადაადგილება, განძრევა არ შეუძლია, მცენარე ნიადაგზეა მიჯაჭვული, მაგრამ ზემოთა ნაწილი მრუდია. მცენარეს უყვარს ცა და სინათლე, ამიტომაც არის ლამაზი ყვავილის ზედა ნაწილი.
3: ცხოველური სტადია. ხაზი გაქრა. ცხოველი ნიადაგზე მიჯაჭვული აღარ არის. გადაადგილება ძალუძს. ორი რგოლია, ზემოთაც სიყვარულია და ქვემოთაც. ცხოველი თავისი გრძნობების ტყვეა. უყვარს, ან არ უყვარს. ეგოიზმი მისი მთავარი თვისებაა. ცხოველი მტაცებელი და მსხვერპლია. მუდმივ შიშში ცხოვრობს. თავის პირდაპირ ინტერესებს თუარ დაიცავს, დაიღუპება.
4: ადამიანური სტადია. აღემატება მინერალის, მცენარის, ცხოველის სტადიებს. ის გზასაყარია. 4-იანი ხაზების გადაკვეთით მიღებული პირველი ციფრია. თუ 4-იანი შეცვლას მოახერხებს, უფრო მაღალ საფეხურზე გადაინაცვლებს. გრძნობების მონობის სტადიას თავი უკვე დააღწია, თავისუფალი არჩევანი აქვს. ან განახორციელებს იმას, რაც ბედისწერამ არგუნა, ან ვერა. მაგრამ არჩევნის თავისუფლება იმავდროულად საშუალებას აძლევს არც კი სცადოს თავისუფლების მოპოვება და გრძნობების ტყვეობიდან გათავისუფლება. 4-იანი ცხოველურ სტადიაზე დარჩენის ან უფრო მაღალ საფეხურზე ასვლის შესაძლებლობაა. კაცობრიობა დღეს ამ გამოწვევის წინაშეა.
5: სულიერების სტადია. 2-იანის საპირისპიროა. ზემოთა ნაწილში ხაზია, ცასთან დაკავშირებული. ქვემოთ წრეა. უყვარს მიწა და მისი ბინადრები. მიწისგან გათავისუფლება მოახერხა, მაგრამ ცისგან თავის დახსნა უჭირს. 4-ისთვის განკუთვნილი გზაჯვარედინი გაიარა, თუმცა ჰაერში ლივლივებს.
6: წრეა ხაზის და კუთხის გარეშე. მთლიანად სიყვარულია. თითქმის სპირალის ფორმის, მზადაა, უსასრულობას ეზიაროს. გათავისუფლდა მიწისგანაც და ცისგანაც, ზემდგომი და ქვემდგომი ბლოკებისგან. ვიბრაციული არხია. ერთადერთი ნაბიჯი დარჩა: შემოქმედის სტადიაზე გადავიდეს.
6 იმავდროულად მზარდი ჩანასახის ფორმაა.
7: გარდამავალი რიცხვია. შებრუნებული 4-იანი. აქაც გზასაყარია. ციკლი დასრულდა, მატერიალური სამყაროს ციკლი; შემდგომ ციკლზე გადასვლაა საჭირო.
8: უსასრულობაა. რვიანის მოხაზვას რომ შეუდგები შეიძლება ვეღარ გაჩერდე.
9: მზარდი ჩანასახია. 9 შებრუნებული 6-იანია. ჩანასახი მზადაა რეალობას შეეგუოს. მისგან იშვება...
10: ესეც თავდაპირველი კვერცხის ნულია, მაგრამ სხვა, უფრო დიდი განზომილების. ეს მეტი განზომილების ნული რიცხვების ახალი ციკლის დასაბამია, მაგრამ უფრო მეტის მასშტაბის რიცხვების. და ასე შემდეგ...
ყოველთვის, როდესაც რიცხვს მოვხაზავთ, მის სიბრძესაც გადმოვცემთ.
ედმონდ უელსი
