ოშოს წიგნიდან - "ნარინჯისფერი წიგნი"
მთარგმნელი: ნინი ანდღულაძე (ლი ლა)
გონება ნაგვის ყუთია! ეს იმას არ ნიშნავს, რომ მხოლოდ თქვენი გონებაა ასეთი და სხვების - არა. იგი ნაგვითაა სავსე და თუკი მის გარეთ გამოტანას დაიწყებთ, ვერასოდეს გაასუფთავებთ მას ბოლომდე. არ არსებობს ამ საქმის ბოლომდე მიყვანის საშუალება. გონება ამოუწურავი ნაგავსაყრელია. იგი მკვდარი კი არა, დინამიურია. იზრდება და თვითმყოფადი ცხოვრება აქვს. თუ ერთ ტოტს მოჭრით, მისი ყლორტები ისევ გაღვივდებიან.
ნაგვის გარეთ გამოტანა არ ნიშნავს, რომ დაცარიელდებით. ამით მხოლოდ იმას გააცნობიერებთ, რომ გონება, რომელსაც თქვენ თქვენს თავთან აიგივებთ და ფიქრობთ, რომ თქვენ ხართ, სინამდვილეში თქვენ არ ხართ. მისი ზემოთ ამოტანით გააცნობიერებთ განცალკევებას, უფსკრულს, თქვენსა და გონებას შორის. ამ დროს ნაგავი რჩება, მაგრამ თქვენ მასთან აღარ იგივდებით, სულ ესაა. ერთმანეთს დაშორდებით და გეცოდინებათ, რომ განცალკევდით. ასე რომ, მხოლოდ ერთი რამე უნდა გააკეთოთ: არ სცადოთ ნაგავთან ბრძოლა და არ სცადოთ მისი შეცვლა. უბრალოდ უყურეთ და დაიმახსოვრეთ ერთი რამ "ეს მე არ ვარ".
დაე, ეს იყოს მანტრა: "ეს მე არ ვარ". დაიმახსოვრეთ ეს, იყავით ფხიზლად და დაინახავთ რა მოხდება. ცვლილებას მაშინვე შეამჩნევთ. ნაგავი ისევ იარსებებს, მაგრამ იგი თქვენი ნაწილი აღარ იქნება.
"ეს მე არ ვარ" - ამ ფრაზის გახსენება გახდება ამ ნაგავზე უარის თქმის მიზეზი.
თუ მოგეწონათ, გააზიარეთ...
