შესავალი
დიმიტრი უზნაძე - ბავშვის ფსიქოლოგია;
სასკოლო ასაკის ფსიქოლოგია
წინასიტყვაობა 1947 წლის გამოცემისთვის
ინტერესი ბავშვის ფსიქოლოგიის მიმართ ყოველთვის დიდი იყო, განსაკუთრებით, მასწავლებელთა და აღმზრდელთა წრეში. მაგრამ 1936 წლის 4 ივლისის ისტორიულ დადგენილებამდე, რომელიც საკავშირო კ.პ (ბ) ცენტრალურმა კომიტეტმა გამოიტანა პედაგოგიურ დამახინჯებათა შესახებ გან სახკომების (განათლების სახალხო კომისარიატი) სისტემაში, ეს ინტერესი ჩვენში ათეული წლების განმავლობაში პედოლოგიური, ყალბ მეცნიერული ძიების ნიადაგზე კმაყოფილდებოდა. ბავშვის ფსიქიკური განვითარების კანონზომიერებათა ნამდვილი მეცნიერულ-ფსიქოლოგიური შესწავლა მაშინ გამონაკლისის სახით თუ წარმოებდა. შევხვდებოდით აქა-იქ ცალკე გამოკვლევებს ბავშვის განვითარების კერძო საკითხებზე, მაგრამ ბავშვის ფსიქოლოგიის კურსის შედგენას არავინ ცდილობდა. 1936 წლის 4 ივლისს ზემოაღნიშნულმა დადგენილებამ, როგორც მოსალოდნელიც იყო, დიდად შეუწყო ხელი არა მარტო პედაგოგიკის გაჯანსაღების საქმეს, არამედ ბავშვის ფსიქოლოგიური შესწავლის გაცხოველებასაც. დღესდღეობით ჩვენ უკვე საკმაოდ დიდი მასალა მოგვეპოვება, რათა ბავშვის ფსიქოლოგიის მთლიანი კურსის შედგენაზე ვიფიქროთ.
თავისთავად იგულისხმება, რომ ასეთი კურსის შედგენისას მხედველობაში უნდა ვიქონიოთ განსაკუთრებით ზემოხსენებული დადგენილების მითითებანი, კერძოდ: მითითება იმის შესახებ, თუ რაოდენ უმართებულოა „საბჭოთა პედაგოგიკაში ანტიმეცნიერული ბურჟუაზიული პედოლოგიის შეხედულებათა და პრინციპთა უკრიტიკო გადმოტანა, პედოლოგიისა, რომელიც ექსპლოატატორულ კლასთა ბატონობის შენარჩუნების მიზნით, ამოცანას ისახავდა, დაემტკიცებინა ექსპლოატატორულ კლასთა და „უმაღლეს რასათა“ საგანგებო ნიჭიერება და არსებობის განსაკუთრებული უფლებები. მეორე მხრივ, მშრომელი კლასების და „დაბალი რასების“ ფიზიკური და გონებრივი განწირულობა. ამიტომ ჩვენ განსაკუთრებით სიფხიზლით უნდა მოვპყრობოდით ე. წ „პედოლოგიის“ თეორიისა და პრაქტიკის ცრუ მეცნიერულ დებულებებს, მეტადრე „პედოლოგიის“ მთავარ „კანონს“ – „კანონს“ ბიოლოგიური და სოციალური ფაქტორების, მემკვიდრეობისა და რაღაც უცვლელი გარემოს გავლენით ბავშვების ბედის ფატალისტური განსაზღვრულობის შესახებ“. ჩვენ შევეცადეთ თავიდან აგვეშორებინა „პედოლოგიის“ ეს საბედისწერო შეცდომა.
ერთი სიტყვით, ჩვენ ვცდილობდით ბავშვის ფსიქოლოგია ჭეშმარიტ მეცნიერულ საფუძვლებზე აგვეგო. ხოლო რამდენად მოვახერხეთ ეს, ამაზე იმედი გვაქვს, დაკვირვებული მკითხველი მიგვითითებს.
1/12 -1947 წ. დიმიტრი უზნაძე.
(მომდევნო თავის სანახავად გადადით შემდეგ გვერდზე)
