„მე ვარ“ (ego sum qui sum ) ცნობიერება
2018 წელი. „მე ვარ“ (ego sum qui sum ) ცნობიერება
- მომიყევი სხვა სამყაროებზე, - ვთხოვე ერთხელ მიქაელს. მისი პასუხი ასეთი იყო:
- თქვენი მეცნიერები თავს იმტვრევენ იმაზე როგორ ამოგზაურონ ადამიანები სხვა პლანეტაზე ან სხვა განზომილებაში ფიზიკური სხეულით და ვერ ხვდებიან რომ ფიზიკური სხეული ამ მატერიალური სამყაროს ნაწილია და მას ეკუთვნის. ფიზიკური სხეულით მოგზაურობაც შესაძლებელია, თუ მისი შემადგენელი მატერიის რხევებს შეცვლი, მაგრამ ეს გაცილებით რთულია სულიერი სხეულით მოგზაურობასთან შედარებით, რადგან ნატიფი მატერია უფრო მოქნილია და მარტივად ემორჩილება გარდაქმნებს. ადამიანს შეუძლია განზომილებათა შორის სხვადასხვა რეალობებში მოგზაურობა. ამისათვის მნიშვნელოვანია ფლობდე ცნობიერების სიხშირის სტაბილურად დაჭერის უნარს. სამყაროები სხვადასხვა სიხშირეებზეა განთავსებული „ვერტიკალისა“ და „ჰორიზონტალის“ გასწვრივ. ვერტიკალი და ჰორიზონტალი ფრაქტალური ხის სტრუქტურის ნაწილია. ვერტიკალის გასწვრივ მოგზაურობა უფრო რთულია და აქ შესაბამისი სულის თვისებები უნდა გქონდეს. ჰორიზონტალის გასწვრივ სამყაროებშიც არის სიხშირეებში განსხვავება, ოღონდ შედარებით მცირე. შენ სწორედ ასეთ სამყაროში იმოგზაურე ერთ-ერთი სიზმარში, როდესაც „სხვა სამყაროს“ ჩვენება მთხოვე (იხ. სხვა სამყარო). განსხვავება სიხშირეში შენ აღიქვი როგორც წანაცვლება ვიზუალურ სპექტრში, რომელიც თავის ადგილზე დადგა, როგორც კი შენი სენსორული აღქმა ამ სამყაროს შეეჩვია. სამყაროთა შორის მოგზაურობისას შესაძლებელია ცნობიერების ე. წ. „დანაწევრება“ (ფრაგმენტაცია), ანუ აქაც შეიძლება იყო და იქაც და ეს არანაირ დისკომფორტს არ მოგანიჭებს თუ ეს უნარი გაგეხსნა. გაიხსენე შემთხვევა სამსახურის ვერანდაზე, როდესაც შენი ცნობიერება ბუზის ცნობიერებაში შევიდა ან ის შემთხვევა, როდესაც შენს შვილს მკურნალობდი და თან მე მელაპარაკებოდი. ამაღლებული ცოცხალი არსების ცნობიერება შეიძლება დაიქსაქსოს და სხვადასხვა ადგილას იყოს ერთდროულად. მეც, როდესაც შენ გვერდით ვარ, ამავე დროს ბევრ სხვადასხვა ადგილას ვარ და სხვადასხვა საქმეს ვაკეთებ. ეს არის ბევრ განზომილებაში ერთდროულად არსებობის უნარი. გახსოვს, როდესაც ბუზის ცნობიერებაში შეხვედი, იგრძენი რომ მას არა აქვს „მე ვარსებობ“ (Я Есмь) თვითგააზრება. ადამიანის ცნობიერება სწორედ ამით განსხვავდება ცხოველების ცნობიერებისგან რომ მას სწორედ ეს „მე ვარსებობ“ თვითგააზრება უჩნდება. რაც უფრო მაღალია ცოცხალი არსებების ცნობიერება (ვგულისხმობ ანგელოზებს და ზემდგომ არსებებს), მით უფრო მძაფრდება „მე ვარსებობ“ აღქმა, სანამ ეს შეგრძნება „მე ვარ, რაც ვარ“ (Я Есмь что Я Есмь!) დონემდე არ მიდის და სანამ არ აცნობიერებ რომ ეს ღმერთია ვინც იაზრებს შენში თავის თვითმყოფადობას! ამიტომ ვამბობ რომ ცოცხალი არსებების ცნობიერების ევოლუცია ღმერთის თვითგააზრების გამოვლინება-გაძლიერებით მიმდინარეობს. ჩემთვის ძალიან მნიშვნელოვანია, რომ შენ დაივიწყო ყველა სტერეოტიპი, რომელსაც ყველა მხრიდან გახვევენ თავს. წინააღმდეგ შემთხვევაში ძალიან გამიჭირდება. მე არ მინდა რომ ჩემი აზრები „ფანტასტიკურად“ და დაუჯერებლად მოგეჩვენოს ან ჩათვალო რომ ეს აზრები არ ჯდება რომელიმე რელიგიის ან მსოფლმხედველობის ჩარჩოებში. ამიტომ არ მინდა რომ ზედმეტად ბევრი რელიგიური და განსაკუთრებით ეზოთერული წიგნები იკითხო. რელიგიებისადმი მიკუთვნების საკითხი უკვე გადალახულია. მე ხშირად ვდებ შენ ცნობიერებაში აზრებს ისე, რომ ისინი შენს გააზრებას ცდება და ველოდები სანამ შენი ქვეცნობიერი მათ გადაამუშავებს და „მიიღებს“, რომ შემდგომ ჩამოაყალიბო და გაიაზრო. რაღაც ეტაპზე კარგია რომ წიგნებს კითხულობდი, მაგრამ ეხლა დროა რომ ეს წიგნები დაივიწყო!..
სამწუხაროდ იმისთვის რომ ბოლომდე ჩვენკენ „მობრუნებულიყავი“, მოხდა დაავადების „პროგრამის“ გააქტიურება. ეს რომ არ მომხდარიყო, შენ იესოსთან შეხვედრის მერეც კი აგრძელებდი მთელი შენი ენერგიის მატერიალურ სამყაროში დაბანდებას. შენი პასუხისმგებლობა, საქმის კარგად კეთების უნარი და შემოქმედებითი ენერგია იხარჯებოდა სამსახურში, ხოლო სიყვარულის და მზრუნველობის - ოჯახში. იყო პერიოდები, როდესაც საერთოდ გკარგავდი და ვეღარ „გხედავდი“. ამ დაავადებამ „მოგაშორა“ სამსახურიც და გარკვეულ დონემდე ოჯახიც, იმისთვის რომ შენი ენერგია შინაგანი განვითარებისკენ მიგემართა და შენი პოტენციალი სრულად გახსნილიყო. ამ დაავადებამ გიბიძგა შინაგანი იოგური პრაქტიკებისკენ და მაღალი „სისუფთავის“ კვების რეჟიმის დაცვისკენ, რაც გაზრდიდა შენი ფიზიკური და სულიერი სხეულების მიერ ნატიფი ენერგიების აღქმის უნარს. სამწუხაროდ დიდ ქალაქებში და არახელსაყრელ გარემოებებში ინკარნაცია იწვევს ასეთი სცენარების განვითარებას, რომ ადამიანი სულიერ გზას არ მოწყდეს. რომ არა შენი ასეთი აქტიური ჩართულობა საერო ცხოვრებაში, ამ კარმული პროგრამის გააქტივება არ იქნებოდა საჭირო. ამიტომ არის, რომ ეს დაავადება არაფერს არ ექვემდებარება და არც დაექვემდებარება სანამ მისი როლი ბოლომდე არ აღსრულდება. როგორც ნათქვამია „არავის შეუძლია ორ ბატონს ემსახუროს ერთდროულად!“.
მიქაელმა ასეთი ვიზუალური გზავნილი გამომიგზავნა - ქანქარა, რომლის ისარი როდესაც გადაიხრება, აღიძვრება ძალა, რომელიც ამ ქანქარის, უკან, ესე ვთქვათ „სწორ ხაზზე“ დაბრუნებას აიძულებს. რაც უფრო ძლიერია სწორი ხაზიდან გადახრა, მით უფრო ძლიერია ძალა, რომელმაც ის თავის ადგილზე უნდა დააბრუნოს.
- ნებისმიერი კარმული უკუგება არის ეს „ძალა“, რომელიც „გადახრაზე“ საპასუხოდ აღიძვრება რომ ადამიანი „სწორ გზაზე“ დააბრუნოს. დაავადებებიც სწორედ ამ მიზანს ემსახურებიან. შენ შენი „ცხოვრებისეული მისიის“ შესასრულებლად შენი კარმა აღძვერი ამ დაავადების სახით. გული მიკვდებოდა როდესაც შენს ტირილს ვხედავდი. მზად ვიყავი და ეხლაც მზად ვარ ნებისმიერ მომენტში წაგიყვანო, როგორც კი მთხოვ, მაგრამ შენ კიდევ რამდენიმე წელი გაქვს. მთელი ძალებით მიჭირავს რეალობა შენ გარშემო, რომ მაქსიმალურად დაცული იყო. ადამიანები, რომლებიც ჩვენს ფორპოსტებს წარმოადგენენ ძალიან ბევრ საქმეს აკეთებენ, ხანდახან ისე რომ თვითონაც არ იციან. მათი გენეტიკიდან და გეოგრაფიული მდებარეობიდან გამომდინარე მათში, როგორც მაგალითად შენში, ხშირად იკვეთება რამდენიმე ქვეყნის ეგრეგორი, რომლებშიც ენერგიას ვანაწილებთ რომ პოლარიზაცია ჩავაქროთ და მატერიალურ განზომილებაში კონფლიქტები გავანეიტრალოთ. ის, თუ როგორ სცენარში ვლინდება ეს ყველაფერი მატერიალურ მატრიცაში, მეორეხარისხოვანია. მათი საშუალებით ცნობიერად და არაცნობიერად ნაწილდება ენერგიები სხვადასხვა ეგრეგორებზე და განზომილებებზე, ყალიბდება და ხორციელდება მენტალური კონსტრუქციები, ხდება მათთან დაკავშირებული ადამიანების ცნობიერებების აწევა და კარმული განმუხტვები. ძალიან დიდი სამუშაოები მიმდინარეობს იმისთვის, რომ კაცობრიობა, მიუხედავად უმძიმესი კარმისა აგრძელებდეს ისეთ ცხოვრებას, ვითომც არაფერი არ ხდება.
