სიბრძნის მცველი
2018 წელი. 29 სექტემბერი. თბილისი. სიბრძნის მცველი
სიზმარი:
ეკლესიასავით შენობაში ვარ სადაც კედლებიც და ჭერიც წმინდანების გამოსახულებებითაა მოხატული. ოღონდ ეს წმინდანები არ არიან ჩემთვის ნაცნობები. ესეთი აზრი მომდის, რომ ისინი კაცობრიობის ისტორიის მანძილზე სიბრძნის მატარებლები იყვნენ. უეცრად ჩემ წინ მოხუც კაცს ვხედავ. მას ანაფორის მსგავსი კაბა აცვია, თოკით წელშემორტყმული. მამაკაცი იატაკზე წევს. მას თმის პატარა ნაწილს აჭრიან. ეს რაღაც სიბოლური ინიციაციის პროცედურაა თითქოს. მე რატომღაც თმაზე ხელს ვიკიდებ, მეც ხომ არ მომაჭრეს-მეთქი, მეფიქრება.
- Хранитель знаний! მან სიბრძნე შელახვისგან უნდა დაიცვას! - მესმის ხმა და მამაკაცს კვერთხს აძლევენ რომელიც სამი ცოცხალი გველისგან შედგება. ცისფერი, ნაცრისფერი და თეთრი გველი ერთმანეთშია გადახლართული, როგორც თოკში ძაფის კონები.
- Три типа знаний, - მესმის ისევ ხმა და ვხვდები, რომ თითოეული გველი გარკვეული ტიპის ცოდნას გამოხატავს.
- Типа интуитивное, интелектуальное... - მეფიქრება ჩემთვის, რადგან ვცდილობ გავშიფრო რას ნიშნავს სამი ტიპის ცოდნა და...
...მეღვიძება.
2018 წელი. 30 სექტემბერი. თბილისი. შენი იარაღი კეთილი გულია
ღამით მეზობლებმა მოინდომეს აივანზე ქეიფი (სიყვარული და მოფერება, როგორც თვითონ ეძახიან ხოლმე ასეთ ურთიერთობას), რომელიც საღამოს 10 საათზე დაიწყო და ნარ-ნარად გადაიზარდა სრულიად უზნეო ღრეობაში ხმამაღალი შეძახილებითა და ღმუილის მსგავსი სიმღერებით. ეს ცალმხრივი სიამოვნება დილის 5 საათამდე გრძელდებოდა და მისი მონაწილეები ვამპირებივით პირველივე მზის სხივზე გაიფანტნენ. ჩემი უკიდურესად ფხიზელი ძილისთვის, როდესაც ხშირად ძილსა და სიფხიზლეს შორის ვიმყოფები და მცირე ხმაც მირტყავს თავში, ეს ღამე აუტანელი აღმოჩნდა. ამ დროს მგრძნობელობა ისეთი მომატებული მაქვს, რომ ხმები ხელის გულებითაც კი მესმის, ამიტომ ეს ხმაური სრულიად გაუსაძლისი გახდა. რაღაც მომენტში ვიგრძენი რომ გავბრაზდი და სრულიად სერიოზულად მოვისურვე რომ ამ „ქეიფის“ მონაწილეებს ისეთი ფაღარათი დამართვნოდათ, რომ ერთმანეთის გადავლით ვერ მიესწროთ საპირფარეშომდე! ვიცოდი, რომ შეცვლილი ცნობიერების მდგომარეობაში რომ შევსულიყავი, მათი ეთერული სხეული მუცლის არეში საათის ისრის საწინააღმდეგოდ დამეტრიალებინა შხამიანი მწვანე ფერის მიღებამდე, რაღაც ასეთი ნამდვილად დაემართებოდათ. ღმერთო, საიდან ვიცი ეს ყველაფერი? - გავიფიქრე და უეცრად ძალიან მძაფრად გავაანალიზე რომ ამას ვერ ვიზამდი! იმიტომ კი არა რომ ტექნიკურად არ შემეძლო, არამედ იმიტომ რომ ასეთი საქციელის ჩადენა ისეთივე წარმოუდგენელი იყო, როგორც მთვარეზე გაფრენა!
მიქაელის ღიმილი ვიგრძენი ისევ.
- შენ აღარ შეგიძლია ადამიანებისთვის ზიანის მიყენება... არასდროს და არანაირი მიზეზით, იმიტომ რომ ეს შენი ბუნება აღარ არის. ნაწილებად რომ აგკუწონ, მაინც ვერ შეძლებ. შენი იარაღი მხოლოდ კეთილი გულია და ამის იქით არაფერი გაგაჩნია. ადამიანისთვის დგება ასეთი ეტაპიც, როდესაც ნებისმიერი, თუნდაც „სამართლიანი“ ძალადობა მისთვის აკრძალულია.
თავი რატომღაც დაჩაგრულად ვიგრძენი, რადგან ვერაფერს ვაკეთებდი და უძილობის გამო ვიცოდი, რომ მეორე დღეს ვეღარ ავდგებოდი ლოგინიდან. ამ უხეშ სამყაროში ასე მარტივად მოწყვლადი არ უნდა იყო და საკუთარ თავზე მომივიდა გული.
- ეს აზრი ეთერული სხეულის დატრიალებაზე მწვანე ფერამდე, საიდან მომივიდა? გამომივიდოდა მაგის გაკეთებას, რომ მომნდომებოდა?
- არა. ესეც სულის ცოდნა ამოტივტივდა. ადრე შეგეძლო... სხვა ცხოვრებებში... მაგრამ არ მინდა გეგონოს რომ ბოროტებას არ უნდა უპირისპირდებოდე. ადამიანები, რომლებსაც მენტალური სხეული 1-ელ და მე-2 დონეზე აქვთ, უხეში ფიზიკური ძალით უნდა ეწინააღმდეგებოდნენ მას; მე-3 დონის ადამიანები სხვადასხვა ტიპის აქტიური ქმედებებით; მათ ვისაც მე-4 დონეზე აქვთ მენტალური სხეული განვითარებული, ანუ ინტელექტუალური ადამიანები, აზრით და სიტყვით უნდა მოქმედებდნენ. ეს ასევე არ ნიშნავს, რომ „ინტელექტუალური“ კატეგორიის ადამიანები ფიზიკურად არ უნდა ჩაერიონ ბოროტების აღმოფხვრაში, თუ ასეთი მათ თვალწინ ხდება. მე იმის თქმა მინდა, რომ ადამიანები უპირატესად იმ „ტალანტის“ დონეზე უნდა მოქმედებდნენ, რაც მათ ღმერთმა მიანიჭა... მაგრამ შენ სულიერი ველებით მოქმედებ და შენი იარაღი ნატიფი ენერგიებია. შენ ან ღმერთთან ხარ ან მის წინააღმდეგ. შუალედური არ არსებობს. ნუ დაღონდები საკუთარ უმწეობაზე. ის რაც შენ სისუსტედ გეჩვენება უდიდესი ძალაა... ხომ გახსოვს „ძალა უძლურებაში აღესრულება“!...
- მგონი ჩემზე უკეთესი წარმოდგენის ხარ, ვიდრე ვარ სინამდვილეში...
- მე თუ მჯერა შენი, შენც ირწმუნე.
- ბოდიში, რომ შენში ეჭვი მეპარებოდა - გავიფიქრე და მეხამუშა საკუთარი ფიქრები, თითქოს ჩემი არ იყო.
- არ ყოფილა მსგავსი არაფერი! მე ბევრჯერ შევამოწმე შენი სული ნდობაზე და პირიქით, აბსოლუტური ნდობა დავინახე. ის რასაც ეჭვები ქონდა, შენი გარეგანი გონება იყო, მენტალური სხეული, რომელიც ბევრ ეგრეგორთანაა კავშირში და მათ ზემოქმედებას განიცდის. მათ შორის ქრისტიანული ეგრეგორის, სადაც ეშმაკისგან ცდუნების შიშს ძალიან ღრმა ფესვები აქვს გადგმული. შენ სიზმარში სატანას ხმამაღალი სიცილი (იხ. „ხიდს იქით გადასვლა“), კლასიკური ქრისტიანური ეგრეგორის მენტალური კონსტრუქციაა. შენი სული ბოლომდე და უპირობოდ მენდობა... ტყუილი არ გითხარი, როდესაც ვთქვი, რომ სამყაროს დასალიერშიც კი წამომყვები (იხ. „შავი ხვრელი“)! ასე რომ არ ყოფილიყო, შევწყვიტავდი შენთან კონტაქტს. ჩვენ არავის და არაფერს ვაძალებთ... და იცოდე, რომ ნდობა სულის დონეზე სხვა რამეა... ეს არ არის „გჯერა თუ არ გჯერა“ ჩემი, ეს სულთა ნათესაობით გამოწვეული კავშირია, ერთობა, რომელსაც ვერავინ და ვერაფერი გაწყვიტავს.
2018 წელი. 2 ოქტომბერი. თბილისი. ჰერმეს ტრისმეგისტი
მე:
- ეხლა ვიფიქრე... ეს ფრაზა... Как вверху, так и внизу, как внизу, так и вверху... ეს ფრაზა, ხომ საიდანღაც არის!
მიქაელი:
- შენ იცი...
მართალია არ ვიცი, მაგრამ ინტერნეტში, ხომ შემიძლია ვნახო. კომპიუტერს ვრთავ და ამ წინადადებაზე ძებნას ვაძლევ. აი რას მიგდებს:
"1908 წელს ჩიკაგოში «The Yogi Publication Society» გამომცემლობით გამოქვეყნდა მცირე ტრაქტატი ჰერმეტულ ფილოსოსფიაში - "ქიბალიონი"."
""სამმა განდობილმა", რომლებმაც დაწერეს ქიბალიონი მოისურვეს ანონიმურად დარჩენა, რამაც გამოიწვია მრავალი სპეკულაცია მათ ავტორობასთან დაკავშირებით".
"ჰერმეს ტრისმეგისტის ზურმუხტის დაფა"...
"როგორც ზევითაა ისე ქვევითაა და როგორც ქვევითაა, ისეა ზევით - პრინციპი ნიშნავს იმას, რომ ყოველთვის არსებობს ურთიერთკავშირი კანონებსა და მოვლენებს შორის ყოფადობის და სიცოცხლის სხვადასხვა დონეებზე. ამ სიტყვებში ასახულია ჰერმეტიკოსების ძველი აქსიომა. ამ პრინციპის დაუფლება გასაღებს იძლევა ბევრი აუხსნელი პარადოქსის და ბუნების ფარული საიდუმლოებების ამოსახსნელად".
ჰერმეს ტრისმეგისტი... ტოტ-ატლანტი
"ამიტომ ვარ მე სამმაგად დიდებულად წოდებული, რადგან ვფლობ სამყაროს ფილოსოფიის სამ ნაწილს."
ჰერმესის ატრიბუტია - მაგიური ძალების მატარებელი კვერთხი. მან აქცია ჰერმესი ღმერთად და ღმერთების მაცნედ. მან გაუხსნა ჰერმესს გზა სამ სამყაროში: ღმერთების, ადამიანების და სულების სამყაროებში. ჰერმესის კვერთხი წარმოადგენს ორ გველს რომლებიც ცენტრალური ღერძის გარშემო არიან შემოხვეულნი და ღერძის ბოლოზე არსებულ მზეს უცქერიან."
ნახ. 20. კადუცეი ანუ ჰერმეს ტრისმეგისტის კვერთხი.
მე:
- აი ვინ იყო ის მოხუცი ჩემ სიზმარში... Хранитель знаний! კვერთხი სამი გადახლართული გველისგან, რომელიც სამი ტიპის ცოდნას განასახიერებდა სამ სამყაროზე!
საშინელი ინტერესი მიპყრობს. უნდა წავიკითხო ყველაფერი რაც მასთანაა დაკავშირებული!
მიქაელი:
- ხომ გინდოდა რამეს ან ვინმეს დაყრდნობოდი?
და ისევ მის ღიმილს ვგრძნობ. საიდანღაც ვიცი, რომ რასაც იქ წავიკითხავ ყველაზე ახლოს იქნება იმასთან რასაც მიქაელი მიყვება! მეც მეღიმება. ეს ყველაფერი დეტექტიურ გამოძიებას ჰგავს და არქეოლოგიურ გათხრებს ერთდროულად.
