60. დილის ვარსკვლავთა შრიალი
60. დილის ვარსკვლავთა შრიალი
დეკლარაცია
როდესაც ხართ დილემის წინაშე და არ იცით ზუსტი პასუხი, გაბედულად ენდეთ თქვენს ინტუიციას. წინათგრძნობების ნდობით შეცდომებისგან დაზღვეული არ ხართ. მაგრამ გაცილებით მეტ შეცდომას დაუშვებთ, თუ მხოლოდ გონების ხმას მიენდობით. თუ გადაწყვეტილების მიღება გჭირდებათ, თქვენს სულზე უკეთ არავინ იცის რა უნდა გააკეთოთ. ხშირად ძნელია იმის გაგება თუ რას გვკარნახობს სული. მაგრამ სავსებით გარკვევით შეიძლება იმის დადგენა, მოსწონს თუ არა მას გონების გადაწყვეტილება. სულიერი დისკომფორტის გრძნობა გონების მიერ მიღებულ გადაწყვეტილების საპასუხოდ, სანდო კრიტერიუმია ჭეშმარიტების დასადგენად.
ახსნა
გონება ფიქრისას იყენებს დამკვიდრებულ განმსაზღვრელებს: სიმბოლოებს, სიტყვებს, სქემებს, წესებს და ა.შ. სული არ საჭიროებს მათ. ის არ ფიქრობს და არ ლაპარაკობს, არამედ გრძნობს ან იცის. თანაც გონება მუდამ შიდა დიალოგითაა გართული. ის ფიქრობს, რომ ყველაფრის ახსნას შეძლებს, და ხელიდან არ უშვებს კონტროლს ინფორმაციაზე. როდესაც გონების კონტროლი სუსტდება, ცნობიერებაში გამოანათებს ინტუიციური გრძნობები და ცოდნა. გონება მოცდა, და ამ მომენტში თქვენ განიცადეთ სულიერი გრძნობა ან ცოდნა. სწორედ ეს არის დილის ვარსკვლავთა შრიალი, ხმა სიტყვების გარეშე, დაფიქრება ფიქრების გარეშე. თქვენ რაღაც გესმით, მაგრამ ბუნდოვნად. კი არ ფიქრობთ, არამედ ინტუიციურად გრძნობთ ან უბრალოდ იცით. სულს შეუძლია შეღწევა ინფორმაციულ ველში და ბევრ შეკითხვაზე პასუხის პოვნა, ის ასევე თავიდან აგაცილებთ მცდარ და საშიშ ნაბიჯებს, თუ მიენდობით მის ხმას. მაგალითად, თუ ფრენის წინ თქვენთვის არადამახასიათებელ მღელვარებას განიცდით, სჯობს გამოტოვოთ ეს რეისი. ან საპირისპირო სქესის გაცნობისას თუ გიწევთ თავის დარწმუნება იმაში,რომ ის თქვენ შეგეფერებათ, შეგიძლიათ დარწმუნებული იყოთ, რომ ამ ურთიერთობისგან კარგი არაფერი გამოვა.
